Petals of Dandelion

 Ika-05:26 ng umaga, nagtimpla ako ng tsaang chrysanthemum. Sa Europa ang bulaklak ng chrysanthemum ay para sa mga patay at nagdadalamhati. Gayun pa man, ito ang gusto kong lasa sa tsaa. Habang hawak ko ang tsaa, sabay ko naman binitbit ang kumot upang magpunta sa likod bahay kung saan may bermuda at mga halaman.

Inilatag ko ang kumot upang makahiga at pagmasdan ang bukang liwayway. Unting unting lumiliwanag at silahis ng araw ay kay sarap damhin. Tila nag-aagaw ang lamig at init ng kalangitan. Sa di-kalayuan kung saan ako nakahiga ay mayroong halaman na puti at nakapalibot ang mga mabalahibong bagay, “Dandelion”.

Habang pinagmamasdan ko ito, unti-unti akong nalulungkot at kumunot ang noo ko. Sumikip ang dibdib at naluluha. Bumangon ako upang umupo at makita ng mabuti ang talulot ng Dandelion. Habang patuloy ang nararamdaman kong pagkalungkot, hinipan ko ang talulot at sumabay sa ihip ng hangin ang mga talulot nito.

Habang pinagmamasdan ko ang paghalo nito sa hangin ng paitaas, nakita ko ang sikat ng araw at di ko na nakita ang lumipad na talulot ng Dandelion, marahil sa liwanag at sikat ng araw. Muli kong pinagmasdan ang talulot nito at sa pagkakatitig, bigla akong humagulgol sa iyak at pinagmasdan na maubos ang talulot ng Dandelion.

Ang pananaghoy ng hinanakit at hugot ng kalungkutan ang bumalot sa kalooban ko. Kahit anong pagluha’t iyak ang aking gawin wala na.. Pag nawala ang mahal mo sa buhay, gaya ng talulot ng Dandelion ay unti-unti itong dadalhin ng hangin. Kahit anong pigil mo ay doon paroon ang kanyang tadhana.

Tumayo ako at naglakad ng kaunti habang sinisinok dahilan ng pag-iyak ko. Sa di-kalayuan natanaw ko ang malawak na taniman ng Dandelion, sabay-sabay na lumilipad ang talulot nito. Napangiti ako dahil alam kong di nag-iisa ang mahal ko sa buhay. Gaya ng ibang talulot may kasama pang ibang talulot. Napawi ang aking pakiramdam at nakahinga ng maluwag. Sa tagal ng panahon na kinimkim ko ito, sa wakas nakaraos din.

Ngayon, napapa-isip ako.. Dandelion o Chrysanthemum?..

PANAGINIP

 

 Alay sa isang Blogger na mahilig sa kaharian...

 

 Dreams are successions of images, ideas, emotions, and sensations that occur involuntarily in the mind during certain stages of sleep.

Sa bawat pikit ko sa gabi ng pagtulog, lagi akong nagnanais makapanaginip ng magagandang bagay. Isang malawak na palaruan at may lumilipad na eroplano na may mahabang takbuhan papunta sa bahay.

Ngunit sa bawat magagandang pangyayari alam kong may kapalit na nakakatakot. Nais mong magising pero di matapos tapos ang pagtakbo mo hanggang madapa ka at mapalingon. Ang dating matingkad na kulay ay pinawi ng kulimlim.

Kailangan lumaban, KAILANGAN.. Panaginip man ay may dalang mensahe sa bawat indibidwal. Ngunit bawat panaginip ang balot ng madaming tanong. Pagkatapos mong mapagod at maluha sa takot biglang may liwanag na kung saan nanggaling.

Marami sa atin na ayaw ng magising kung kanais-nais ang tema ng panaginip. Kung mananatili kang matutulog at mananaginip marahil ay napag-iwanan ka na ng panahon. Ang panaginip ay mensahe mula sa kaibuturan ng bawat isa sa atin. Di madalas mangyari o ang iba di na maalala ang kanilang huling panaginip. Tama lang na matuwa sa panaginip ngunit ang tunay na ligaya at saya nasa totoong panaginip.. "ANG MULAT NA BUHAY"...